Украина соопшти дека е извршен руски напад врз енергетската инфраструктура во регионот Ривне

ИСТАНБУЛ (АА) - Украина денес соопшти дека во текот на ноќта бил извршен руски напад врз објект од енергетската инфраструктура во западниот регион Ривне во земјата, пренесува Анадолу.

„Уште еден непријателски напад врз регионот Ривне. Цел беше објект на енергетската инфраструктура“, истакна гувернерот на Ривне, Олександр Ковал, во изјавата на Телеграм.

Ковал рече дека сите релевантни служби работат на местото на нападот, додавајќи дека првичните процени укажуваат дека нема жртви.

Во соопштението се додава дека повеќе информации за нападот ќе бидат достапни во текот на денот.

Во друго соопштение, Украинските воздухопловни сили тврдат дека собориле 22 од 28 дрона лансирани минатата ноќ од Русија над регионите Киев, Чернихив, Виниција, Хмелницки, Житомир, Суми, Одеса, Миколаев и Днепропетровск.

„Регистрирани се неколку напади врз објекти од клучната инфраструктура во регионите Тернопил и Ривне“, се вели понатаму.

Руските власти сѐ уште не ги коментирале овие тврдења.