Убиени 12 лица, а 11 се ранети во израелски напад врз градот Беит Џин во околината на Дамаск

ИСТАНБУЛ (АА) – Најмалку 12 лица загинаа, меѓу кои жени и деца, а 11 беа ранети рано утринава во израелскиот напад врз градот Беит Џин и патот што води до Мазрат Беит Џин во околината на Дамаск, објавија официјалните сириски медиуми, јавува Анадолу.

Државниот телевизиски канал Алихбарија објави дека по нападите израелските беспилотни летала продолжиле да летаат над областа, особено по должината на патот што ги поврзува двата града.

Многу жртви сѐ уште се заробени под урнатините, се додава во соопштението, а жителите продолжуваат да работат на нивно извлекување.

Телевизиската куќа соопшти дека по нападот десетици семејства избегале од Беит Џин кон блиските побезбедни области.

Претходно телевизијата објави дека израелска патрола влегла во градот и накратко се судрила со локалните жители пред да се повлече.

Израелската армија соопшти дека за време на операцијата се повредени шестмина израелски војници, од кои тројца се во критична состојба.

Таа истакна дека притворила членови на „Џама Исламија“, тврдејќи дека тие „дејствувале во областа Беит Џин во Јужна Сирија и ги засилиле нападите против израелските цивили“.

Израелската армија изврши 47 напади во Јужна Сирија во ноември.

Владините податоци покажаа дека израелската армија извршила над 1.000 воздушни напади врз Сирија и повеќе од 400 прекугранични напади во јужните провинции од декември 2024 година.

По падот на режимот на Башар ал-Асад кон крајот на 2024 година Израел ја прошири својата окупација на сириската Голанска Висорамнина со заземање на демилитаризираната тампон-зона, потег со кој го прекрши Договорот за раздвојување од 1974 година со Сирија.