Турција во Пакистан ја презеде контролата врз училишта поврзани со ФЕТО

КАРАЧИ (АА) - Учителите и студентите топло ја пречекаа делегацијата на турската Фондација „Маариф“, која денес во јужниот пристаништен град Карачи ја презеде контролата врз три училишта поврзани со терористичката организација ФЕТО, јавува Anadolu Agency (AA).

Церемонијата на преземање на управата на училиштата беше одржана во комплексот „Pal-Turk Maarif International Schools“ во местото Гулшан-е-Игбал.

Махмуд Оздил, член на одборот на Фондацијата „Маариф“ и владин претставник од јужната област Синд, каде што главен град е Карачи, ги потпиша документите со што се означи официјалното предавање на контролата врз училиштата.

На церемонијата присуствуваа и Селахатин Батур, директор на Фондацијата, Сјед Исрар Али, виш директор на „Pak-Turk Maarif International Schools and Colleges“ и други.

Двајца студенти им предадоа букети на членовите на Фондацијата.

Претходно, делегацијата заедно со турскиот генерален конзул, Толга Учак, се сретна со министерката за внатрешни работи на Синд, Ќази Кабир. Генералниот конзул и членовите на Фондацијата ѝ се заблагодарија на Владата на Синд за предавањето на училиштата.

Претходно, Фондацијата ја презеде контролата врз училиштата поврзани со ФЕТО во главниот град, Исламабад, и во вториот по големина град, Лахоре.

Минатиот месец Врховниот суд на Пакистан нареди Владата да ја прогласи ФЕТО за терористичка група и да ги забрани нејзините училишта во земјата.

Турција во 2016 година ја основаше Фондацијата „Маариф“, со цел да го преземе управувањето со училиштата поврзани со ФЕТО. Оваа фондација, исто така, основа училишта и образовни центри во странство.