Трамп: САД се обидуваат да ја вратат воздухопловната база Баграм од талибанците

ВАШИНГТОН (АА) - Американскиот претседател Доналд Трамп денес изјави дека неговата администрација се обидува да го обезбеди враќањето на воздухопловната база Баграм од талибанците, иако деталите за досегашните тајни преговори се речиси непознати, јавува Анадолу.

Трамп рече дека дел од неговата мотивација за обидот за повторно преземање на објектот се должи на неговата близина до локацијата каде што Кина произведува нуклеарно оружје, жалејќи се што американската контрола над Баграм не е одржана за време на американското повлекување под водство на поранешниот претседател Џо Бајден.

„Им ја дадовме за џабе. Патем, се обидуваме да ја вратиме“, рече Трамп на прес-конференцијата со британскиот премиер Кир Стармер.

„Се обидуваме да ја вратиме затоа што им требаат работи од нас. Ја сакаме назад таа база. Но една од причините зошто ја сакаме базата е, како што знаете, тоа што е на еден час оддалеченост од местото каде што Кина го произведува своето нуклеарно оружје. Така што, се случуваат многу работи, но многу сум разочаран од фактот дека тоа не е решено“, додаде тој.

Претходно не беа откриени преговорите со талибанците. Базата Баграм е под нивна контрола по повлекувањето на САД од Авганистан во 2021 година. Местото беше најголема американска воена база во земјата.