Зеленски објави дека Украина спроведува контраофанзива против Русија во Донецк

ИСТАНБУЛ (АА) – Украинскиот претседател Владимир Зеленски денес изјави дека украинските трупи спроведуваат контраофанзива во источниот регион Донецк против руските сили, тврдејќи дека се заробени 100 руски војници, пренесува Анадолу.

Во видеообраќањето споделено на Телеграм за време на посетата на регионот, Зеленски вели дека се случуваат „жестоки судири“ како дел од тековната „контраофанзива“ во близина на населбите Покровск и Добропиља, два клучни фронта во регионот.

Тој не прецизираше кога започнала контраофанзивата, но тврдеше дека украинските сили успеале да ѝ нанесат „значајни загуби“ на руската војска и ја спречиле да преземе офанзива во областа.

Зеленски тврди дека украинските сили ја вратиле контролата над 160 квадратни километри и седум населени места од почетокот на контраофанзивата, како и дека „расчистиле“ повеќе од 170 квадратни километри и девет населени места од руско присуство.

Исто така, тој истакна дека биле заробени речиси 100 руски војници.

Руските власти сè уште не ги коментирале тврдењата, а нивна независна верификација е тешка поради војната што трае повеќе од три и пол години.