Трамп: САД извршија многу успешни напади врз 3 ирански нуклеарни локации

ВАШИНГТОН (АА) - Американскиот претседател Доналд Трамп синоќа изјави дека американските сили завршиле „многу успешни“ воздушни напади врз три ирански нуклеарни локации, поради страв од пошироко разгорување на судирите во регионот, јавува Анадолу.

Трамп рече дека полн товар бомби е фрлен врз „примарната“ иранска нуклеарна постројка во Фордо, а дополнителни напади се извршени врз објектите во Натанц и Исфахан. Сите американски воени авиони го напуштиле иранскиот воздушен простор, рече тој.

„Сите авиони се безбедно на пат кон дома. Честитки до нашите големи американски воини. Нема друга војска во светот што можеше да го стори ова“, објави Трамп на социјалните медиуми. „СЕГА Е ВРЕМЕ ЗА МИР! Ви благодарам за вниманието кон ова прашање.“

Нуклеарната постројка во Фордо е подземен објект за збогатување на ураниум во близина на Ком - најдлабоката и најзајакнатата нуклеарна инсталација во Иран дизајнирана да издржи конвенционални воздушни напади.

Иран силно го предупреди Трамп против вмешување во конфликтот со Израел, велејќи дека ако САД директно влезат во судирот, тоа ќе доведе до „непоправливи последици“.

Трамп постојано се закануваше дека ќе преземе воени мерки против Техеран и тврдеше дека САД нема да му дозволат на Иран да се здобие со нуклеарно оружје, нешто што Иран постојано негираше дека се стреми да го стекне.

Непријателствата избувнаа на 13 јуни кога Израел започна воздушни напади врз неколку локации низ Иран, вклучително и воени и нуклеарни објекти, што го натера Техеран да започне одмазднички напади.

Израелските власти соопштија дека најмалку 25 лица се загинати, а стотици се повредени оттогаш во иранските ракетни напади.

Во Иран, 430 лица се убиени, а над 3.500 се ранети во израелските напади, според иранското Министерство за здравство.