Тела на 28 убиени Палестинци донесени во болница во северниот дел на Појасот Газа

АНКАРА (АА) - Директорот на болницата „Камал Адван“, Хосам Абу Сафија, денес информираше дека телата на 28 убиени Палестинци, меѓу кои има 10 деца и 10 жени, се донесени во болницата по израелско бомбардирање во близина на болницата во северниот дел на Појасот Газа, известува Анадолу.

„Изгубивме многу ранети поради недостаток на основни медицински ресурси потребни за спасување човечки животи“, рече директорот Абу Сафија.

Тој додаде дека ситуацијата е катастрофална поради недостатокот во здравствениот систем и недостапноста на лекарства и основни санитарни средства.

Израел започна брутална воена офанзива врз Појасот Газа со неселективно бомбардирање на цивилни населби, училишта, верски објекти и болници по нападот на палестинската група Хамас на 7 октомври.

Во израелските напади на Појасот Газа се убиени над 35.386 Палестинци, воглавно деца и жени, а 79.366 се повреди во услови на масовното уништување и големиот недостиг на неопходни средства за живот.

Израел воведе целосна блокада на Појасот Газа, оставајќи го неговото население, особено жителите на северна Газа, на работ на гладување.

Пред Меѓународниот суд на правдата Израел е обвинет за геноцид. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.