Сијарто во Анкара: „ТОГГ е показател колку се развила турската економија, турскиот народ со право може да се гордее“

АНКАРА (АА) - ДИЛДАР БАЈКАН АТАЛАЈ -

Министерот за надворешни работи и трговија на Унгарија, Петер Сијарто, изјави дека ТОГГ е најдобар показател колку се развила турската економија и додаде дека турскиот народ со право може да се гордее, јавува Анадолу.

Сијарто престојува во Туркије по повод отворањето на „Медикор Медикала“ (Medicor Medicala), нова инвестиција на Унгарија во Туркије, и по тој повод одговараше на прашањата на новинарот на Анадолу.

На прашањето за ставот на Унгарија околу нератификувањето на членството на Шведска во НАТО, Сијарто рече дека овој процес на одобрување е во рацете на Парламентот и дека Владата го известила Парламентот за своите позитивни ставови.

„Шведските власти последните години постојано ја понижуваа Унгарија и унгарскиот народ, го критикуваа и ја доведуваа во прашање демократијата на нашиот политички систем. Шведска нè обвини дека не се придржуваме до заедничките европски вредности, дека ги кршиме демократските стандарди, дека ја доведуваме во прашање зрелоста на унгарскиот народ самиот да одлучува за својата иднина. Го доведоа во прашање легитимитетот на нашиот избор, а со тоа и на Парламентот. Поради тоа, лицата кои водат сопствена предизборна кампања не разбираат како надворешен фактор може да ја доведе во прашање легитимноста на парламентарните избори“, рече Сијарто.

На прашањето во врска со процесот за членство на Туркије во Европската Унија, Сијарто потсети дека во моментов не постои консензус за Туркије во Европската Унија.

„Бидејќи некои земји не се доволно храбри отворено да ги кажат своите ставови лице в лице, тие го зборуваат тоа зад затворени врати. Некои земји се сериозно против забрзувањето на процесот за прием на Туркије. Под тие околности, ние како Унгарија сакаме да воспоставиме најдобра соработка меѓу ЕУ и Туркије“, порача Сијарто.

Потсетувајќи дека неговата земја е една од најмногу погодените земји поради соседството со Украина во која се води војна, министерот Сијарто ја истакна важноста на улогата на Туркије на тоа поле.

„Единствен успешен обид за посредување беше договорот за жито што го потпиша Туркије, лично претседателот Ердоган. Договорот за жито е единствениот важен договор што завојуваните страни (Русија и Украина, заб.ав.) го постигнаа од избувнувањето на војната. Затоа сметаме дека Туркије треба да игра главна улога во наредниот период, кога ќе се создадат услови за мировни преговори“, рече Сијарто и додаде:

„Затоа се надеваме дека турската Влада ќе продолжи да работи и ќе придонесува за мирот во светот.“

Сијарто се осврна и на турскиот електричен автомобил ТОГГ.

„Фактот дека Туркије може да произведе сопствен автомобил покажува колку се развила турската економија, бидејќи националната автомобилска индустрија покажува дека економијата е во напредна фаза“, рече Сијарто и додаде: „Свесни сме какви напори се потребни за да се дојде до точката во која е Туркије. Од таа причина, турскиот народ со право може да се гордее со себе.“

Тој додаде дека на турските колеги им пренел дека во контекст на турскиот ТОГГ, го разгледуваат неговото излегување на унгарскиот пазар, истакнувајќи дека ТОГГ би можел да им биде конкурентен на другите брендови.

На крајот му посака успех на турскиот претседател Ердоган на претстојните избори.