ИСТАНБУЛ (АА) - Сирија го осуди денешниот напад на израелската армија врз градот Беит Џин во околината на Дамаск како „криминален напад“, велејќи дека упадот и последователните воздушни напади претставуваат воено злосторство, јавува Анадолу.

Во соопштението на Министерството за надворешни работи се вели дека израелска воена патрола влегла на сириска територија во Бејт Џин, каде што се соочила со локалните жители и „ги нападнала цивилите и нивниот имот“, предизвикувајќи директни судири што ја принудиле патролата да се повлече.

По неуспешниот упад израелските сили започнаа „намерни и брутални“ напади врз градот, опишувајќи ги како „целосно воено злосторство“, се додава во соопштението.

Сирија соопшти дека го смета Израел за „целосно одговорен“ за нападот и неговите последици, вклучително и за жртвите и уништувањето, предупредувајќи дека континуираната „криминална агресија“ ја загрозува регионалната стабилност и одразува систематски напор за дестабилизација на областа и наметнување „агресивна реалност со сила“.

Најмалку 13 лица беа убиени, меѓу кои жени и деца, а исто толку беа ранети рано утрово во израелскиот напад врз градот Беит Џин и патот што води до Мазрат Беит Џин во околината на Дамаск, според официјалните сириски медиуми.

Израелската армија соопшти дека за време на операцијата се повредени шестмина израелски војници, а тројца од нив се во критична состојба.

Армијата тврди дека притворила членови на „Џама Исламија“, наведувајќи ека тие „дејствувале во областа Беит Џин во Јужна Сирија и напредувале во нападите врз израелските цивили“.

Израелската армија изврши 47 напади во Јужна Сирија во ноември.

Владините податоци покажаа дека Израел извршил над 1.000 воздушни напади врз Сирија и повеќе од 400 прекугранични напади врз јужните провинции од декември 2024 година.

По падот на режимот на Башар ал-Асад кон крајот на 2024 година Израел ја прошири својата окупација на сириската Голанска Висорамнина со заземање на демилитаризираната тампон-зона, потег со кој е прекршен Договорот за раздвојување со Сирија од 1974 година.