Ümit Dönmez
07 Септември 2023•Ажурирај: 08 Септември 2023
ПАРИЗ (АА) - Забраната за носење абаја во училиштата стана топ тема којашто го одвлече вниманието од другите проблеми на образовниот систем на Франција, како што се недостигот на наставници и преполните училници, јавува Анадолу.
Владата ја забрани абајата, широка наметка што ја носат некои ученички муслимани, од понеделникот, кога започна учебната година.
„Од 12 милиони ученици во земјата, 298 од нив дојдоа на училиште со абаја и покрај забраната, а 67 од нив одбија да ја соблечат“, изјави министерот за образование Габриел Атал.
Забраната на абајата не е нова дебата за Франција, таа доминира во француската агенда на вести веќе некое време со тенденција да ги засени вистинските проблеми во образовниот систем, истакнаа синдикатите на наставниците.
Генералната секретарка на синдикатот Снес-ФСУ, Софи Венетитај, за Франс интер на 28 август изјави дека дебатата за абајата го маскира недостатокот на наставници и пренатрупаните одделенија.
Претседателот Емануел Макрон и министерот ветија дека секое одделение ќе има учител.
Вработените во училиштата кои најмногу се соочуваат со тие проблеми ќе започнат штрајк во наредните денови во знак на протест поради недостигот на ресурси.
Синдикатите на наставниците бараат и повисоки плати.
Според извештајот објавен во 2022 година, просечната плата на наставник во Франција со 15-годишно искуство е за 19 отсто помала од просечната плата во земјите членки на Организацијата за економска соработка и развој (OECD).
