Giovanni Legorano
07 Септември 2023•Ажурирај: 08 Септември 2023
РИМ (АА) - Италија приведе 81 лице поради наводни врски со мафијашката група „Ндрангета“ и разни злосторства, пренесува Анадолу.
Списокот на наводни злосторства извршени од луѓето вклучува изнуда, корупција, трговија со оружје и дрога, насилни закани и убиство.
Приведувањата беа наредени од судијата Никола Гратери, шеф на Обвинителството во Катанцаро и обвинител за борба против мафијата.
Карабинерската полиција соопшти дека 29 од овие лица биле ставени во затвор, додека останатите 52 се во домашен притвор.
Операцијата е резултат на истрагата што минатиот мај доведе до приведување на 61 лице обвинети за слични кривични дела.
Во овие рамки, под истрага се вкупно 170 лица, соопшти полицијата.
Истрагата им овозможи на обвинителите да ја разберат криминалната динамика и врските меѓу криминалците и претприемачите во калабриската област Вибо Валентија.
Конкретно, обвинителите ги обвинуваат приведените за изнуда од локалните бизниси во секторот за недвижнини и туризам.
Тие, исто така, обвинуваат дека некои од приведените ги корумпираат локалните политичари за да доделат работни места на блиски луѓе во замена за поддршка на изборите.
Меѓу приведените, има и адвокати кои наводно ги измамиле локалните власти за незаконски да добијат јавни средства наменети за финансирање на приемот и грижата за мигрантите.
