Симболот на Дакар, Сенегал - Џамија изградена по трагите на еден сон

- Фатма Есма Арксан ОЗДЕЛ​​​​​​​

Џамијата Илахијат (Grande Mosquee de la Divinite), лоцирана на брегот на океанот во Дакар, главниот град на Сенегал, изградена според сонот на еден верски научник, се смета за едно од најважните обележја на градот, јавува Анадолу.

На брегот на Атлантскиот Океан, во срцето на сенегалската престолнина, се наоѓа џамијата Илахијат, уникатно место за молитва што се издвојува од другите места за богослужба во градот поради посебна традиција петочната молитва да се изведува исклучително во бели ќелабии - традиционални долги фустани што ги носат мажите.

Оваа необична практика, позната како „Бел петок“, се одржува со години благодарение на тестаментот на основачот на џамијата, истакнатиот исламски научник Мухамед Сејни Гуеје. Според неговата желба, запишана пред да почине, секој верник што сака да се помоли на џума во џамијата Илахијат мора да биде облечен во чисто бела ќелабија.

Дизајнирана од познатиот сенегалски архитект Чеик Нгома, белата форма на џамијата, која се вклопува во океанот, е дополнета со две аголни минариња од 45 метри.

Процесот на изградба на џамијата Илахијат се издвојува како најзначаен елемент по кој се разликува од другите места за богослужба во градот.

Приказната за џамијата, локално позната како „Рабани масџид“, датира од сон што го сонувал Мухамед Сејни Гуеје, верски научник што живее во Уакам.

Синот на Гуеје, Мухамед Неби Гуеје, му раскажа на новинарот на Анадолу за историјата на оваа џамија.

Гуеје објасни дека татко му решил да ја изгради џамијата според сонот.

„Татко ми го сонувал овој сон на 28 јуни 1973 година. Во сонот, светлечки модел на џамија се појавил среде океанот и полека се спуштил на карпестиот брег – токму на местото каде што денес се наоѓа џамијата. Татко ми потрчал да го види моментот кога џамијата ‘паѓа’ од небото, беше длабоко потресен од тоа“, раскажува Гуеј.

Тој рече дека штом се разбудил татко му ги нацртал деталите на џамијата што ја видел во сон, додавајќи дека изградбата започнала во 1992 година.

Гуеје нагласи дека изградбата била завршена во 1997 година, по пет години и пет месеци, а оттогаш вратите на џамијата никогаш не се затворени.

Гуеје нагласи дека молитвата џума се извршува во бело, за разлика од другите места за богослужба.

„На татко ми во сон му беше советувано молитвата џума да ја извршува во бело. Затоа, оние што сакаат да ја извршуваат петочната молитва во џамијата треба да бидат облечени во бело.“