Esin Eşkinat Sayılgan
01 Декември 2021•Ажурирај: 01 Декември 2021
ЊУЈОРК
Судот во американската сојузна држава Њујорк по повторното разгледување на случајот, го ослободи од обвинението поранешниот затвореник, кој беше осуден на 16 години затвор под обвинение дека ја силувал писателката Алис Себолд, известува Агенција Анадолија (АА)
Афроамериканецот Ентони Бродвотер, во 1982 година, на 20-годишна возраст, тогаш студент на Универзитетот во Сиракуза, беше осуден за виновен по обвинението дека ја силувал Себолд. Откако обвинителите го преиспитале случајот, по одлежани 16 години затвор, тој е ослободен од обвинението и отстранет од листата на сексуални престапници.
Окружниот суд во округот Онондага се извини, соопштувајќи дека тоа не требало да се случи, имајќи предвид дека Бродвотер е осуден исклучиво врз основа на сведочењето на едно лице и доказите добиени по методот на микроскопска анализа на косата, кој се покажа како неточен.
Бродвотер, кој од самиот почеток на случајот изјавуваше дека е невин, имал потешкотии да изгради живот за себе затоа што неговото име било на списокот на сексуални престапници откако бил ослободен во 1998 година. Работејќи како ѓубреџија, Бродвотер штедел пари за да ангажира адвокат, кој ќе ја докаже неговата невиност.
Во изјава за „Асошиејтед прес“ (Associated Press), Бродвотер, истакнувајќи дека окружниот обвинител му се извинил пред судењето, продолжи со зборовите „Кога зборуваше за неправдата што ми беше направена, не можев а да не заплачам. Се чувствував многу полагодно што окружен обвинител застана покрај мене во овој случај.“
- Продуцентот на филмот ги забележа недоследностите во процесот
Американскиот весник „Њујорк тајмс“ (New York Times) објави вест во која наведува дека филмскиот продуцент Тимоти Мучианте помогнал Бродвотер да биде ослободен од обвинението.
Во веста се вели дека Мучианте, сфаќајќи ја неусогласеноста во судскиот процес, во јуни се повлекол од проектот во кој за „Нетфликс“ (Netflix) правел адаптација на книгата „Lucky“, која на Себолд ѝ донесе слава и во која тематиката е сексуалниот напад.
Мучианте не останал само на тоа, туку се договорил со адвокати и ангажирал приватен детектив, добивајќи докази кои помогнале во ослободувањето на Бродвотер од обвинението.
Во интервју за радиото НПР (NPR), Мучианте изјави: „Почнав да се сомневам, но не од она што го раскажала Алис за нападот, туку од случувањата во судот, објавени во втората половина од книгата. Приказните не се совпаѓаа.“
Мучианте рече дека забележал дека Бродвотер претходно немал други злосторства во неговото досие и не извршил никакви злосторства ниту откако бил пуштен од затвор, додавајќи дека Бродвотер „официјално бил затворен додека минувал улица“.
Себолд во книгата раскажува дека веднаш по инцидентот отишла во полиција, доказите биле собрани, но немало приведувања. Пет месеци подоцна, Себолд, минувајќи по улица, го забележала Бродвотер и се посомневала дека тој е лицето кое ја силувало, по што ја известила полицијата, но по полицискиот распит, наместо него, Себолд идентификувала друго лице.
Полицијата, тврдејќи дека Бродвотер бил пријател со лицето избрано во распитот, ја насочила Себолд, која во судницата овој пат го идентификувала Бродвотер.
- Алис Себолд се извини
Познатата писателка, во изјавата што ја објави по ослободителната пресуда за Бродвотер, наведе дека како 18-годишна трауматизирана жртва на силување, избрала да му верува на американскиот правосуден систем и дека нејзината цел во тоа време не била да создаде неправда, туку да се осигура дека правдата е задоволена.
Во продолжение, Себолд го вели следното:
„Во никој случај мојата цел не беше засекогаш да го променам животот на друг млад човек поради злосторството што ми го промени животот. Благодарна сум што г. Бродвотер конечно е невин и ослободен од обвиненијата, но тоа не го менува фактот дека тој беше еден од младите Афроамериканци кои беа прогонувани од нашиот проблематичен правосуден систем пред 40 години. Засекогаш ќе жалам за она што му беше направено.“
Алис Себолд, чии книги се преведени на повеќе јазици, се прослави со нејзината книга „Среќната девојка“ (Lucky), која е продадена во повеќе од 1 милион примероци. Познатиот режисер Питер Џексон, во 2002 година, нејзиниот роман „Прекрасни коски“ (The Lovely Bones) го адаптира во филм, кој беше номиниран за Оскар.
