МОСКВА (АА) - Рускиот претседател Владимир Путин денес изјави дека Москва е подготвена да ја одржи следната рунда мировни преговори со Украина во Истанбул, јавува Анадолу.

Говорејќи на прес-конференција во Минск, Белорусија, Путин рече дека датумот на третата рунда руско-украински преговори во Истанбул ќе биде утврден по завршувањето на размената на воени заробеници, договорена во Турција на 2 јуни.

„Општо земено, ние сме подготвени за тоа (следната рунда преговори), треба да го координираме местото и времето. Се надевам дека претседателот на Република Турција, господин (Реџеп Таип) Ердоган, ќе остане на својот став да го поддржи овој процес и ние сме му многу благодарни за ова“, рече тој.

Датумите на следната руско-украинска средба ќе бидат дефинирани од шефовите на преговарачките тимови, додаде Путин.

„Ние сме подготвени да одржиме таква средба во Истанбул. Но, кога конкретно, за тоа се лидерите на групите од двете страни, тие се во постојан контакт, тие сега се договараат за времето на состанокот“, рече рускиот претседател.

Тој додаде дека според негово мислење, тимовите треба да разговараат за меморандуми за мировен договор.