ИСТАНБУЛ (АА) – Рускиот претседател Владимир Путин изјави дека Москва е подготвена за трета рунда мировни преговори со Украина и ја поздрави идејата за средба со американскиот претседател Доналд Трамп, опишувајќи го како „храбар човек“, јавува Анадолу.

Во обраќањето до медиумите во Минск, Путин потврди дека шефовите на делегациите во моментов преговараат за датумот за следната рунда преговори, истовремено признавајќи дека Украина и Русија поднеле „два директно спротивставени меморандуми“.

Сепак, додаде тој, „ова не е изненадувачки“, нагласувајќи дека преговорите се наменети за истражување на „начините за приближување“.

„Веќе предадовме повеќе од 6.000 тела (на украински војници) и сме подготвени да предадеме уште речиси 3.000. Но, од украинската страна зависи дали ќе ги прифати“, рече Путин.

Коментирајќи ги односите со Вашингтон, рускиот претседател рече дека односите со САД почнуваат да се стабилизираат и дека се преземени првите чекори во таа насока.

„Средбата со Трамп е целосно можна. Со задоволство ќе се подготвиме за неа“, рече Путин, додавајќи: „Тој е храбар човек, тоа е јасно.“

Путин нагласи дека американските бизниси сигнализираат интерес за враќање на рускиот пазар. „Ние само ќе го поздравиме тоа. Мора темелно да се подготви.“

Тој, исто така, се осврна на издвојувањата за одбрана на Русија, кои се проценуваат на 13,5 билиони рубли (171 милијарда долари), и рече дека оваа инвестиција ја поддржува целта за завршување на „специјалната воена операција“ во Украина со „поволен исход“, а не како закана за Европа.

Тој нагласи дека Кремљ разгледува постепено намалување на издвојувањата за одбраната во следните три години, критикувајќи ги плановите на Европа за зголемување на сопствените воени буџети.

Одговарајќи на западните обвинувања за руска агресија, Путин посочи дека Западот е тој што дејствувал агресивно, мислејќи на украинската револуција во 2014 година.

„Тие извршија државен удар, го поддржаа, платија за него, а потоа тврдеа дека Русија се однесува агресивно. Тие идиоти се или нè сметаат за будали?“