Русија објави документ во кој се тврди дека Украина планирала офанзива на Донбас овој месец

МОСКВА (АА) - Портпаролот на руското Министерство за одбрана, Игор Конашенков, објави документи кои ѝ припаѓаат на Украинската армија, кои наводно содржат таен налог за напад овој месец врз регионот Донбас, контролиран од сепаратистите, пренесува Агенција Анадолија (АА).

Конашенков тврди дека командантот на Украинската национална гарда, генерал Микола Балан, издал тајна наредба на 22 јануари 2022 година.

Наведувајќи дека наредбата е испратена до соодветните единици, Конашенков тврди дека потписите на документот се оригинални.

Конашенков исто така наведе дека споменатата наредба вклучува план за подготовка на релевантните воени единици да започнат офанзива во областа на операцијата на здружените сили во Донбас.

Изјавувајќи дека во февруари украинските власти немаа планови да го решат проблемот со Донбас сосила, и ја објавија својата посветеност на дипломатските и политичките чекори, Конашенков рече: „Сепак, оригиналите на тајните документи за напад на украинската Национална гарда јасно ја докажуваат неточноста на овие изјави. Засега едно прашање е нејасно: Колку длабоко американската администрација и сојузниците на НАТО беа вклучени во планирањето и подготовката на нападот на украинските сили на Донбас на почетокот на март?“