Русија и Украина ќе разменат повеќе од 40 затвореници

АНКАРА (АА) - Комесарите за човекови права на Русија и Украина, денеска, по средбата во турската престолнина се согласија да разменат повеќе од 40 затвореници, јавува Агенција Анадолија (АА).

Татјана Москалкова, комесарката за човекови права на Русија и Дмитро Лубинец, комесар за човекови права на украинскиот Парламент, се состанаа во Анкара во рамки на Меѓународната конференција за иднината на човековите права во 21 век.

Москалкова рече дека ги ревидирале списоците на одредени воени притвореници и одлучиле да ослободат повеќе од 40 од нив.

„Побарав помош од Лубинец за повторно обединување на одредени Украинци со нивните семејства во Русија. Бидејќи хуманитарните коридори не работат одвреме-навреме, на оние со сериозни болести им е потребна и помош од омбудсманите“, објасни таа.

Москалкова додаде дека се разговарало и за активноста на Меѓународниот комитет на Црвениот крст, велејќи дека Црвениот крст помогнал да се достават писма до семејствата на заложниците.

„Со помош на нашата армија и специјалните служби, сега се обидуваме да лоцираме лица чии локации се непознати“, рече таа.

Лубинец нагласи дека Русија успеала да пронајде 22 лица и дека тие сега се вратиле во својата татковина. Тој додаде дека на средбата разговарале и за повеќе хуманитарни прашања.

Москалкова, исто така, рече дека Туркије е едно од најпогодните места во овој поглед во моментов за размена на ранети и затвореници.

Таа по средбата рече дека и покрај логистичките предизвици, присуствувале повеќе од 30 претставници од глобалната заедница на Омбудсманот.

Москалкова додаде дека со неа се состанал и претседателот на турскиот Парламент, Мустафа Шентоп.

Москалкова изјави дека поради тоа што немало дипломатски контакти меѓу Русија и Украина поради војната, биле водени разговори меѓу омбудсманите на Русија и Украина.