Русија го обвини Израел за провокација, загрозувајќи цивилни авиони

МОСКВА (АА) - Игор Конашенков, портпарол на Министерството за одбрана на Русија, го обвини Израел за провокација поради воздушните напади во Сирија, јавува Anadolu Agency (AA).

„Во вчерашните напади врз Сирија од страна на израелските воени авиони „Ф-16“, директно беа загрозени два патнички авиона“, истакна Конашенков.

Тој во Москва на прес-конференција ги коментираше воздушните напади на Израел, во близина на Дамаск.

Конашенков изјави дека Израел извршил напади во регионот во период кога цивилните авиони се обидувале да слетаат на аеродромите во Дамаск и Бејрут.

„Поради вчерашните провокативни напади на израелските воени авиони „Ф-16“ од воздушниот простор на Либан врз Сирија, директно беа загрозени два патнички авиона. За да се спречи трагедија, воведени беа ограничувања при слетувањето на патничките авиони“, нагласи Конашенков.

Сириската официјална новинска агенција САНА тврдеше дека воздушните сили на Израел вчера извршиле напад врз западниот рурален регион на Дамаск.