Dmitri Chirciu
11 Август 2021•Ажурирај: 12 Август 2021
МОСКВА
Талибанците ја презедоа контролата врз целата должина на границата на Авганистан со Узбекистан и Таџикистан, рече рускиот министер за одбрана, повикувајќи ги земјите на Организацијата на договорот за колективна безбедност (CSTO) да бидат подготвени наспроти заканата од шверцерите на дрога и терористите кои ќе искористат можност да се инфилтрираат во Русија преку државите од Централна Азија.
Сергеј Шојгу, вчера на форумот насловен „Територија на сетилата“ во Москва, рече дека Талибанците ја зазеле провинцијата Кундуз, која е голем и важен центар во Авганистан.
Министерот рече дека земјите на Организацијата на договорот за колективна безбедност треба да бидат подготвени да се справат со заканата од шверцерите на дрога и терористи во Авганистан што се инфилтрираат во Русија преку Таџикистан, Киргистан и Узбекистан.
Нагласувајќи дека руската, таџикистанската и узбекистанската војска спроведоа заеднички вежби во близина на границата со Авганистан, Шојгу рече дека Москва ќе продолжи да одржува вакви вежби со своите сојузници од Централна Азија во регионот редовно.
Заедничките вежби што војниците од трите земји ги спроведоа вчера имаа за цел да одговорат на влошената ситуација во регионот и да ги отфрлат терористичките закани од соседен Авганистан.
Во соопштението во четвртокот, Шојгу рече дека Русија ќе ги користи своите воени бази во Узбекистан, Таџикистан и Киргистан во случај на директна агресија од Авганистан.
Минатата недела, началникот на Генералштабот на земјата рече дека Русија ги зголемила испораките на оружје за земјите од Централна Азија како одговор на таквата закана.
Русија продолжува да бара суштински, мирни преговори со сите страни во Авганистан. Таа ќе го задржи овој став на состанокот на Tројката плус (Кина, Русија, САД и Пакистан), закажан за 11 август во Доха, изјави заменик-портпаролот на руското Министерство за надворешни работи, Александар Бикантов, минатата недела.
Талибанците вчера влегоа во Фарах, во западен Авганистан, со што стана деветти провинциски центар што делумно или целосно ставен под контрола на бунтовниците.
Во големиот поттик да се одбие напредувањето на Талибанците од урбаните центри, авганистанските сили тврдат дека убиле 361 бунтовник во воздушни и копнени напади во изминатите 24 часа. Авганистанското Министерство за одбрана соопшти дека операциите биле спроведени во провинциите Нангархар, Кунар, Логар, Пактија, Пактика, Мајдан Вардак, Кандахар, Сар-е Пол, Хелманд, Кундуз и Баглан.
Откако ја презедоа контролата врз речиси 200 рурални области, Талибанците започнаа напади врз поголемите градови, марширајќи кон Херат, Кандахар, Талукан и Лашкаргах, предизвикувајќи паника и загриженост кај милиони цивили.
