Ahmet Gürhan Kartal
01 Септември 2021•Ажурирај: 02 Септември 2021
ЛОНДОН (АА) - Британската амбасада советуваше многу Авганистанци да отидат на влезот Аби на аеродромот во Кабул, каде што минатата недела беше извршен терористичкиот напад во кој загинаа повеќе од 170 лица, пренесува Агенција Анадолија (АА).
Амбасадата ги насочила Авганистанците кои се обидуваа да најдат начин да ја напуштат земјата по преземањето на талибанците да се упатат кон влезот само неколку часа пред самоубиствениот бомбашки напад, и покрај предупредувањата од Велика Британија и САД за непосредна терористичка закана, јави „Би-би-си.
Во мејловите што ги видел „Би-би-си“ пишува дека Британската влада му кажувала на авганистанскиот народ да го користи влезот „Аби“ во близина на хотелот „Барон“.
Друг мејл, испратен до поранешен авганистански преведувач, чие име не беше откриено од безбедносни причини, имаше прашање дали е на вистинското место.
„Ве молам известете доколку сте на правилниот влез? Влезот Аби... на улица Шаваси“, пишува во мејлот.
„Доколку ги следев нивните совети, немаше да ме има повеќе. Реков нема, не се чувствувам безбедно бидејќи ситуацијата се влошуваше“, рече поранешниот преведувач.
„Ќе беше лудост да отидев таму, тоа ми го спаси животот. Нашето сопствено расудување ни ги спаси животите.“
Советодавната канцеларија на Велика Британија за надворешни работи, комонвелт и развој ја опиша безбедносната состојба во Авганистан како „непостојана“ само еден ден пред смртоносниот напад.
„Постои тековна и голема закана за терористички напад“, се вели во соопштението.
„Не патувајте на Меѓународниот аеродром Хамид Карзаи во Кабул. Ако сте во областа на аеродромот, оддалечете се на безбедна локација и чекајте дополнителни совети.“
Во нападот, чија одговорност ја презеде терористичката организација ДЕАШ, загинаа најмалку 170 луѓе, вклучувајќи 13 американски војници.
