Enes Canlı
25 Ноември 2022•Ажурирај: 30 Ноември 2022
ЕРУСАЛИМ (АА) - Арапката Лејла Авде, дописничка на францускиот телевизиски канал „Франс 24“ (France 24), беше нападната од страна на радикални Евреи затоа што зборувала арапски на местото на бомбашкиот напад што се случи вчера, на 23 ноември, во Западен Ерусалим (Кудс), јавува Агенција Анадолија (АА).
Инцидентот се случи во денот кога беа изведени два одделни бомбашки напади во Западен Ерусалим. Радикалните Евреи ја нападнаа Лејла Авде, која работи за телевизискиот канал „Франс 24“, затоа што зборуваше арапски додека во живо известуваше од областа Гиват Шаул, едно од местата во кои беше извршен бомбашки напад.
Додека група од околу 30 лица се обиделе да го саботираат преносот застанувајќи пред камера, дошло до вербален дуел меѓу група млади и новинарката Авде. Некои луѓе во групата извикувале „Смрт за Арапите!“, „Арапите да одат во Русија!“, „Ова е арапска експлозија!“
Според вестите објавени во меѓународните медиуми, по завршувањето на преносот во живо, радикалните Евреи ја опколиле телевизиската екипа и „продолжувајќи со навредите и зголемувајќи го своето агресивно однесување“, на репортерката Авде ѝ извикувале „Одете во Газа!“
Во вестите се наведува дека лицата кои со тупаници го удриле камерманот на „Франс 24“, го скршиле стативот на камерата.
Новинарката Лејла Авде беше нападната и за време на Маршот на знамето, кога радикалните еврејски доселеници, извикувајќи провокативни и расистички слогани, ги нападнаа Палестинците и членовите на печатот во мај.
Израелската полиција објави дека во средата, на 23 ноември, во период од половина час, биле извршени бомбашки напади на две автобуски постојки на одделни точки на крстосниците Гиват Шаул и Рамот во Западен Ерусалим, во кои загинал еден Израелец, а повредени се 14 лица, од кои 3 потешко.
Иако сè уште никој не ја презеде одговорноста за нападите, израелските власти воведоа забрана за објавување поради истрагата.
