МОСКВА (АА) - Рускиот претседател Владимир Путин ќе престојува во официјална посета на Казахстан кон крајот на мај, соопшти денес Кремљ, пренесува Анадолу.

Според соопштението на Кремљ, казахстанскиот претседател Касим-Жомарт Токаев го поканил Путин во државна посета на Казахстан, во врска со претстојниот состанок на Врховниот евроазиски економски совет во Астана кон крајот на мај.

„Владимир Путин потврди дека ќе присуствува на состанокот на Врховниот евроазиски економски совет што ќе се одржи кон крајот на мај во Астана. Касим-Жомарт Токаев го покани претседателот на Русија да престојува во државна посета на Казахстан, паралелно со присуството на настанот. Неговата покана беше со благодарност прифатена“, се вели во соопштението.

Двајцата лидери разговараа и за развојот на билатералните економски односи и разменија мислења за меѓународни прашања, соопшти Кремљ.

Врховниот евроазиски економски совет е управно тело на Евроазиската економска унија (ЕАЕУ), регионална организација за економска соработка што ја сочинуваат неколку евроазиски држави. Основана во јануари 2015 година, ЕАЕУ ги вклучува Ерменија, Белорусија, Казахстан, Киргистан и Русија.