Претседателот на Советот на ЕУ нагласи почитување на суверенитетот на Сирија по израелските напади врз Дамаск

БРИСЕЛ (АА) - Претседателот на Европскиот совет денес изрази загриженост во врска со израелските воздушни напади врз сирискиот главен град Дамаск, нагласувајќи ја потребата од почитување на суверенитетот и територијалниот интегритет на Сирија, известува Анадолу.

„Многу сум загрижен од израелските напади врз Дамаск денес. Суверенитетот и територијалниот интегритет на Сирија треба да се почитуваат“, напиша Антонио Коста на X.

Тој, исто така, повика на смиреност во услови на ескалација на тензиите: „Ги повикувам сите страни да се воздржат од насилство и да ја деескалираат ситуацијата“.

Израел денес ги обнови своите воздушни напади во Сувајда, јужна Сирија, во најновото кршење на суверенитетот на земјата, под образложение дека ја штити заедницата Друзи во Сирија.

Нападите се случија откако сириската армија распореди сили во покраината за да ја врати безбедноста и да ги заштити цивилите и нивниот имот, по судирите што настанаа меѓу вооружените групи Друзи и Бедуини во кои животот го загубија најмалку 30 лица.

Најмалку едно лице загина, а 18 се повредени денес кога Израел изврши воздушни напади врз сирискиот главен град Дамаск, објави Министерството за здравство на земјата.

Сириската државната новинска агенција САНА објави дека воени авиони во главниот град извршиле напади врз комплексот на Генералштабот и претседателската палата, позната како Каср ал-Шааб.