АНКАРА (АА) - Премиерот на Нов Зеланд, Кристофер Лаксон, денес изјави дека она што се случува во Газа е „крајно ужасно“ и „неприфатливо“, јавува Анадолу.

Говорејќи за новинарите во Велингтон, Лаксон го критикуваше израелскиот премиер Бенјамин Нетанјаху, велејќи дека „отишол предалеку“.

„Мислам дека Нетанјаху отиде предалеку. Мислам дека ја изгуби врската со реалноста. Она што го гледаме, нападот врз Газ, е целосно, целосно неприфатливо“, рече Лаксон.

Изјавите ги даде по напнатата седница во Парламентот, на која пратениците расправаа за планот на Нов Зеланд да го признае палестинскиот државен статус.

Тој додаде дека Нов Зеланд е мала држава со многу ограничена трговија со Израел, но дека секогаш застанува зад своите вредности.

„Она што го видовме е дека Израел воопшто не го слуша светот. Побаравме непречено доставување на хуманитарна помош. Тоа не се случи“, рече премиерот.

Лаксон нагласи дека планот на израелскиот премиер за целосна окупација на Газа би претставувал прекршување на меѓународното право и предупреди дека последните напади би можеле да го „угаснат патот“ кон решение со две држави.

„Ви го кажувам моето лично мислење, како човек што ја гледа ситуацијата. Така се чувствувам“, изјави тој.

По одлуките на Франција, Велика Британија, Канада и Австралија да ја признаат независната палестинска држава на претстојното Генерално собрание на ОН следниот месец, Нов Зеланд соопшти дека разгледува сличен чекор.

Израел се соочува со зголемена осуда за својата геноцидна војна во Газа, каде што од октомври 2023 година уби речиси 61.600 Палестинци.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.