Премиерот на Либија ја суспендира министерката за надворешни работи поради тајна средба со израелскиот министер

ТРИПОЛИ (АА) - Либискиот премиер Абдел Хамид Дбеибе ја суспендира министерката за надворешни работи Наџла ал-Манѓуш откако таа тајно во Рим се сретнала со израелскиот министер за надворешни работи Ели Коен, пренесува Анадолу.

„Одлучено е да се суспендира либиската министерка за надворешни работи Наџла ал-Манѓуш и да се започне истрага за неа“, се вели во уредбата објавена од страна на Владата на национално единство.

Во саботата, израелското Министерство за надворешни работи објави дека минатата недела била одржана „историска средба“ меѓу министрите за надворешни работи на Израел и Либија.

Посочувајќи дека средбата била прва меѓу министрите за надворешни работи на двете земји, се наведува дека се разговарало за историските односи меѓу двата народа, за наследството на либиските Евреи и за можноста за соработка меѓу двете земји.

Дбеибе го назначи Фатала Зани, актуелниот министер за млади, за привремен министер за надворешни работи, додека случајот со Ал-Манѓуш ѝ е предаден на истражната комисија.