Ekip
12 Ноември 2021•Ажурирај: 13 Ноември 2021
ДАКА
Премиерката на Бангладеш, Шеика Хасина Вазед, ги повика глобалните лидери да дејствуваат сериозно со цел да се обезбеди рано и безбедно враќање на бегалците Рохинџа во нивното родно место во Мјанмар, јавува Агенција Анадолија (АА).
„Светот мора да дејствува сериозно за да се обезбеди наскоро враќање на Рохинџите во Мјанмар“, изјави Хасина во Париз за време на Четвртото издание на Парискиот мировен форум, 2021 година.
Нејзиниот говор на Форумот, на кој присуствуваа и американската потпретседателка Камала Харис и други светски лидери, беше пренесуван во живо од приватни медиуми.
Лидерката на Бангладеш моментално е во Франција во петдневна државна посета.
„Безбедносните ризици од кризата нема да останат само ограничени на нашите граници“, предупреди таа, осврнувајќи се на одложувањето на мирното и достоинствено враќање на прогонетите муслимани Рохинџа во нивната земја како криза за целиот регион. „Веќе гледаме знаци за тоа“, објави државната новинска агенција „Сангбад Сангста“ од Бангладеш.
Над еден милион Рохинџи без државјанство со години живеат во бедните импровизирани шатори во јужниот дел на земјата Кокс Базар.
Според „Амнести интернешнал“ (Amnesty International), над 750.000 муслимани Рохинџи, од кои најмногу деца и жени, избегале од Мјанмар и преминале во Бангладеш откако безбедносните сили на Мјанмар започнаа репресивни мерки против муслиманското малцинство во август 2017 година, зголемувајќи го бројот на прогонети во Бангладеш на над 1,2 милиони.
„Од 25 август 2017 година, речиси 24.000 муслимани Рохинџи се убиени од страна на безбедносните сили на Мјанмар, над 114.000 се претепани, 18.000 жени и девојки Рохинџа се силувани, над 115.000 домови на Рохинџите се запалени и 113.000 други се вандализирани од страна на државните сили на Мјнамар“, се вели во извештајот на Меѓународната агенција за развој Онтарио (OIDA).
Барајќи поглобален одговор на кризата со Рохинџите, Хасина додаде дека Бангладеш привремено ги засолнил присилно раселените државјани на Мјанмар за да избегне голема регионална криза.
Претходно таа го повика францускиот претседател Емануел Макрон и побара од него да го изнесе прашањето за Рохинџите на Советот за безбедност на ОН, каде што Франција е постојана членка.
