Burak Bir
12 Март 2024•Ажурирај: 13 Март 2024
ЛОНДОН (АА) - За муслиманската заедница во Лондон, светиот месец Рамазан оваа година започна со загриженост и во страв, пишува Анадолу.
Наглиот пораст на исламофобијата поттикнат од израелските напади врз Газа и неодамнешните упади во џамиите ги зголемија стравувањата и доведоа до повици за зајакнати безбедносни мерки.
Од средината на февруари имаше серија инциденти во џамиите низ Лондон, вклучително и упади во три џамии.
Тоа се случува во период кога, според Tell MAMA, контролор кој се фокусира на антимуслиманските инциденти, исламофобичните инциденти во Велика Британија се зголемени повеќе од три пати од 7 октомври, кога Израел ја започна својата смртоносна војна во Појасот Газа.
Со оглед на тоа што повеќе муслимани ги посетуваат џамиите за време на Рамазан, вклучително и ноќната тарави молитва, постои голема потреба заедницата да „биде многу внимателна“, рече Биби Рабија Кан, претседателка на Лондонското исламско културно друштво (LICS).
„Исламофобијата е во пораст и луѓето во нашата заедница беа изложени на напади затоа што се муслимани“, рече Кан.
За неодамнешните инциденти во џамиите, Кан рече дека се чини дека сторителите сакале да оштетат работи како што се системите за видео надзор и да земат хард дискови од компјутерите.
Таа, исто така, спомена некои други неодамнешни инциденти во џамијата во Вембли на почетокот на март и во други џамии во Лестер, и ја истакна потребата од строги безбедносни мерки за време на Рамазан.
„Загрижени сме поради порастот на исламофобијата. Загрижени сме за нашите деца и верниците во џамиите. А за време на Рамазан имаме и терави молитви. Многу сме загрижени“, рече Кан.
Таа рече дека може да има уште повеќе инциденти поради влошувањето на ситуацијата во Газа, каде во израелските напади загинати се повеќе од 31.100 Палестинци, главно жени и деца, а повредени се над 72.700.
Израел, исто така, воведе блокада на палестинската енклава, оставајќи го нејзиното население соочено со глад.
„Има луѓе кои се загрижени и има луѓе кои се лути, затоа што, како можеме да гледаме и толерираме да се убиваат толку многу деца, а за тоа да не се грижиме?“, праша Кан.
Таа рече дека тие се координираат со полицијата за да се осигури дека сите џамии имаат функционални системи за надзор.
Како одговор на прашањето на новинарот на АА за напорите за решавање на безбедносните проблеми за време на Рамазан, Метрополитенската полиција соопшти дека од 7 октомври тесно соработува со претставниците на еврејската и муслиманската заедница во главниот град.
„Полицајците се распоредени да ја осигурат безбедноста и да ги истражуваат прекршоците во близина на верските училишта, местата за богослужба и во оние заедници каде што знаеме дека нивото на загриженост е највисоко“, рече портпаролот на полицијата.
„За жал, и покрај зголеменото присуство на полицијата, видовме значително зголемување на кривичните дела од омраза низ Лондон“, се вели во соопштението.
