Ekip
10 Март 2025•Ажурирај: 11 Март 2025
КВИНСЛЕНД / НОВ ЈУЖЕН ВЕЛС (АА) - Поранешниот тропски циклон Алфред продолжува да предизвикува обилни врнежи низ југоисточен Квинсленд и во северниот дел на Нов Јужен Велс, додека се движи кон внатрешноста, поплавувајќи патишта и оставајќи десетици илјади домаќинства без струја, пренесуваат локалните медиуми, јавува Анадолу.
Според Австралиската радиодифузна корпорација (ABC), повеќе од 238.000 домаќинства и бизниси останале без електрична енергија во двете држави, додека 20.300 луѓе во североисточниот дел биле евакуирани.
Циклонот во саботата стигна до брегот на Квинсленд како „тропска депресија“ откако 16 дена беше активен како циклон.
Денес наутро беше издадено ново предупредување за силна бура во делови од Квинсленд, вклучувајќи ги Ипсвич, Логан, Скеник Рим, Саншајн Коуст, Бризбејн и Мортон Беј.
Австралиското Биро за метеорологија (BoM) предупреди на интензивни врнежи што би можеле да предизвикаат опасни и животозагрозувачки поплави, особено покрај реката Бремер и потоците Варил и Лејдли.
На жителите во засегнатите области им беше наложено да се преместат на повисоки места или да бидат подготвени веднаш да ја напуштат областа доколку опасноста се зголеми.
Во северниот дел на Нов Јужен Велс продолжуваат врнежите, а поплавените патишта доведоа до предупредувања за граѓаните да не се обидуваат да возат низ водата.
„Сè уште не сме надвор од опасност“, изјави денес Шон Кернс, помошник-комесарот на Службата за вонредни ситуации на Нов Јужен Велс.
„Ризикот од обилни врнежи се очекува да продолжи во текот на денешниот ден и можеби во вторник, што дополнително ќе ја влоши ситуацијата“, додаде тој.
Жителите на Херви Беј, северно од Бризбејн, беа повикани да останат во своите домови откако во рок од неколку часа паднаа 250 милиметри дожд, предизвикувајќи нагли поплави.
Австралиското Биро за метеорологија соопшти дека обилните врнежи и силните бури и понатаму претставуваат закана во југоисточниот дел на Квинсленд и во северниот дел на Нов Јужен Велс.
Досега, едно лице загина, а уште 30 други се повредени во инциденти поврзани со дождот и поплавите, меѓу кои се и 13 припадници на Австралиските одбранбени сили.
Во погодените области, 685 училишта остануваат затворени.
