Поранешниот министер за одбрана на Белгија, Флау, предлага прекинување на билатералните односи со Израел

БРИСЕЛ (АА) - Поранешниот министер за одбрана на Белгија и поранешен претседател на Парламентот, Андре Флау, побара од Владата да го отповика амбасадорот во Израел, пренесува Анадолу.

Како што наведуваат белгиските медиуми, Флау најостро го осудил постапувањето на Израел, додавајќи дека она што се случува во Газа може да се нарече „геноцид“.

Флау, министер во Владата на Брисел/Валонија, бара од Владата да го отповика белгискиот амбасадор во Израел.

Тој истакна дека Израел не го почитува меѓународното право и ја повика Белгија да преземе итни мерки против израелската Влада.

Додаде дека Израел мора да ја почитува нацрт-резолуцијата усвоена од Советот за безбедност на Обединетите нации (СБОН), која бара итен прекин на огнот за време на Рамазан, муслиманскиот месец на постот.

„Ова е важна одлука која има за цел да стави точка на геноцидот што се врши врз палестинскиот народ“, рече Флау.

Тој порача дека ниту една држава не е над законот.

„Не смееме ниту да бидеме соучесници ниту заложници на постапките на израелскиот премиер Бенјамин Нетанјаху и неговата влада“, додаде тој.

Нагласи дека доколку израелската Влада и понатаму инсистира на овој став, Белгија треба да воведе политички и економски санкции, а доколку е потребно и да ги прекине билатералните односи со Израел.