Поради насилствата во Нигерија раселени над 2 милиони луѓе

АБУЏА (АА) - Повеќе од 2 милиони луѓе се раселени поради тековното насилство во западноафриканската држава Нигерија, пренесува Агенција Анадолија (АА).

Самуела Исопи, шефицата на делегацијата на Економската заедница на западноафриканските држави (ECOWAS) и на Европската Унија, истакна дека тековното насилство во североисточна Нигерија е алармантно.

Наведувајќи дека десетици илјади луѓе ги загубиле животите поради насилството во регионот, Исопи рече дека повеќе од 2 милиони луѓе се раселени.

Таа посочи дека повеќе од 3 милиони луѓе се соочуваат со несигурност за храна и дека стотици илјади деца страдаат од акутна неисхранетост. „Бројот на деца кои не можат да одат на училиште поради насилство е зголемен двојно.“

Повеќе од 20.000 луѓе загинаа во масовните акти на насилство организирани од терористичката организација Боко Харам, која постои во Нигерија од почетокот на 2000-тите години.

Организацијата од 2015 година извршува напади и во пограничните соседни земји како што се Камерун, Чад и Нигер. Најмалку 2.000 луѓе ги загубија животите во нападите на организацијата во басенот на езерото Чад.

Стотици илјади луѓе се принудени да мигрираат во земјата поради терористичките напади и конфликти.