Servet Günerigök
20 Октомври 2019•Ажурирај: 21 Октомври 2019
ВАШИНГТОН (АА) - Американскиот претседател, Доналд Трамп, изјави дека Соединетите Американски Држави (САД) нема да го одржат Самитот на Г-7 (групата седум индустриски најразвиени земји во светот) во неговото голф-одморалиште „Дорал“ во Мајами, по острите реакции на демократите и групите за следење на етиката, пренесува Anadolu Agency (AA).
„Сметав дека правам нешто многу добро за нашата земја со користење на „Трамп Нешнал Дорал“ (Trump National Doral), во Мајами, за одржување на Самитот на лидерите на Г-7“, напиша Трамп на Твитер, истакнувајќи ја големината и близината на комплексот до Меѓународниот аеродром во Мајами.
Во четвртокот, Белата куќа објави дека „Трамп Нешнал Дорал“ ќе биде местото каде што ќе се одржи Самитот во јуни, а Трамп веднаш беше критикуван за мешање на неговиот приватен бизнис со функцијата. Одлуката се виде како обид на претседателот да влијае врз странските влади во негова корист.
Претставникот од демократите, Џери Надлер, претседател на Комисијата за правосудство во Претставничкиот дом на САД, истакна дека ќе го испита „најдрскиот“ пример за прекршување на клаузулата за приходи, од Уставот на земјата, од страна на Трамп, клаузула што им забранува на американските државни службеници да стекнат какви било видови економски бенефит како резултат на својата функција.
Центарот за уставна одговорност, тинк-тенк организација за етика, го обвини Трамп за поигрување со Уставот поради третирањето на Самитот како реклама за неговите бизниси.
„Истакнав дека ќе го сторам тоа без каков било профит или, доколку е законски дозволено, без никакви финансиски трошоци за САД. Но, како и обично, непријателски расположените медиуми и нивните партнери демократи полудеа!“ рече Трамп.
„Затоа, поради медиумското и ирационално непријателство од демократите, „Трамп Нешнал Дорал“ во Мајами, нема да биде местото за одржување на Г-7 во 2020 година“, напиша тој, додавајќи: „Веднаш ќе ја започнеме потрагата по друга локација, вклучувајќи ја и можноста за Кампот Дејвид“!
