Recep Şakar
03 Март 2022•Ажурирај: 04 Март 2022
МЕЛБУРН (АА) ‒ Петстотини илјади луѓе се погодени од поплавите што ги предизвикаа обилните врнежи од дожд во австралиската држава Нов Јужен Велс и во главниот град на државата, Сиднеј, јавува Агенција Анадолија (АА).
Доминик Перотет, премиерот на Нов Јужен Велс, одржа прес-конференција во Сиднеј на која информира дека на 500.000 луѓе низ државата им е наредено да се евакуираат од своите домови поради обилните дождови кои се очекуваат денеска.
Соопштувајќи дека ситуацијата ќе се влоши, премиерот Перотет рече: „Голем број луѓе денеска се разбудија согледувајќи дека поголемиот дел од нашата држава е под вода.“
Тој соопшти дека нивото на водата во некои области ќе биде повисоко од минатогодишните разорни поплави: „Очекуваме поплавите да бидат полоши од минатогодишните, особено во областа Хоуксбери, а поројни врнежи од дожд и поплави во текот на денот ќе ги зафатат подрачјата на Њукасл и Хантер.“
‒ Во поплавите животот го загубија 14 лица -
Вкупно 14 лица ги загубија животите во поплавите кои од викендот досега ги зафатија подрачјата на сојузните држави Нов Јужен Велс и Квинсленд.
Додека трае потрагата по 5 лица за кои беше соопштено дека се водат како исчезнати во поплавите од кои се погодени стотици илјади луѓе, дадено е предупредување дека може да се зголеми бројката на починати.
Најавувајќи дека обилните дождови ќе продолжат проследени со силен ветер, Бирото за метеорологија на Австралија соопшти дека лошите временски услови ќе попримат димензии кои би биле многу опасни за животите на жителите.
Постои загриженост дека новите дождови ќе предизвикаат нови поплави бидејќи речните корита во моментов се полни над сопствените капацитети.
Има значителни прекини во транспортот поради надојдените води што се шират од излеаните реки во регионите поради обилните врнежи кои траат речиси една недела, поплавувајќи ги автопатите, улиците и железничките линии.
Во регионот каде што се затворени голем број училишта, службите за итни случаи продолжуваат да работат со чамци и глисери, како и со хеликоптери, за да ги спасат Австралијците кои се наоѓаат заробени на мостовите, на крововите и на балконите на куќите.
