Ayhan Şimşek
01 Септември 2023•Ажурирај: 03 Септември 2023
БЕРЛИН (АА) – Поддршката за германската либерално-левичарска коалициска Влада падна на историски најниско ниво од 36 отсто, додека екстремно десничарската Алтернатива за Германија (AfD) достигна рекордно висока поддршка од 22 отсто, покажува новото истражување на јавното мислење на јавниот сервис АРД, пренесува Анадолу.
Податоците објавени синоќа покажуваат дека поддршката за Социјалдемократската партија (СПД) на канцеларот Олаф Шолц изнесува 16 отсто, што е за еден поен помалку од почетокот на минатиот месец.
Коалициониот партнер на СПД, Зелените, исто така загуби еден поен, паѓајќи на поддршка од 14 отсто. Помалиот коалициски партнер, либералната Слободна демократска партија (ФДП), беше поддржана од 6 отсто од испитаниците.
Главната опозиција во Германија, конзервативната алијанса на Христијанско-демократската унија (ЦДУ) и Христијанско-социјалната унија (ЦСУ), е фаворизирана од 29 отсто од испитаниците.
Екстремно десничарската АфД, која беше под надзор на разузнавачките служби како закана за демократијата, забележа уште повисока поддршка од претходно забележаната, 22 отсто, според истражувањето спроведено од „ДојчландТренд“ за АРД.
Анкетата покажа дека економијата е главната загриженост за германските гласачи, а 46 отсто рекоа дека очекуваат економската ситуација за една година да биде полоша отколку што е денес.
Околу 26 отсто од гласачите ја наведуваат имиграцијата како нивна главна загриженост, потоа климатските промени (18 отсто), социјалната неправда и сиромаштијата (16 отсто) и енергетската политика на Владата (9 отсто).
Екстремно десничарската АфД ја удвои својата поддршка од последните избори во 2021 година, и извлече најголема добивка од големото незадоволство од политиките на коалициската Влада.
Околу 79 отсто од анкетираните се или помалку среќни или воопшто не се задоволни со либералната коалиција на левиот центар, според најновата анкета. Само 19 отсто од испитаниците се изјасниле дека Владата работи добро.
Раководството на АфД постојано го критикува ставот на Владата на Шолц за руско-украинската војна, се противи на испраќањето оружје во Украина и тврди дека прекинот на увозот на енергенси од Русија е против националните интереси на Германија.
