Necva Taştan Sevinç
18 Февруари 2026•Ажурирај: 20 Февруари 2026
ИСТАНБУЛ (АА) - Француските обвинители отворија две прелиминарни истраги поврзани со случајот на Џефри Епстин, соопшти денес Обвинителството во Париз, повикувајќи ги потенцијалните жртви во Франција да се јават и да сведочат, јавува Анадолу.
Париската обвинителка Лор Беко изјави дека истрагите се започнати со цел да се испитаат наводните сексуални кривични дела и можните финансиски злосторства поврзани со случајот, објави „Франс инфо“.
Едната истрага се однесува на сомнителни акти што спаѓаат под „кривични дела со сексуална конотација“, кои би можеле да бидат квалификувани како „трговија со луѓе од страна на организирана група“, додека втората се фокусира на можните економски и финансиски аспекти на случајот.
Беко изјави дека одлуката следува по неодамнешното објавување на голем број документи од страна на американските власти, истакнувајќи дека „не можеме да ги игнорираме можните откритија на факти што би можеле да имаат кривично-правна квалификација“.
Таа нагласи дека обвинителството има намера да ги поддржи жртвите и да прибере сведоштва.
„Сакаме да застанеме покрај овие жртви. Ќе ги примиме сите изјави што ќе посакаат да ги дадат“, изјави таа.
Според обвинителката, истражувачите ќе анализираат различни јавно достапни извори, вклучувајќи медиумски извештаи, пријави од организации за заштита на деца, сведоштва и пријавување од наводни жртви, со цел вкрстување на информациите.
Обвинителката, исто така, предупреди дека објавувањето на милиони страници документи поврзани со случајот „неизбежно ќе ја реактивира траумата кај некои жртви“, вклучително и кај лица кои претходно не ѝ биле познати на јавноста или на властите.
На 30 јануари, Министерството за правда на САД објави повеќе од 3 милиони страници документи, 2.000 видеа и 180.000 фотографии, согласно со Законот за транспарентност на досието Епстин, кој беше потпишан минатиот ноември.
Тие материјали вклучуваат транскрипти од големата порота и истражни записи, иако многу страници остануваат силно цензурирани. Преживеаните и роднините на жртвите на Епстин велат дека објавата не ги исполнува сите барања на законот и пропушта витални информации.
Властите го пронајдоа Епстин мртов во неговата затворска ќелија, откако извршил самоубиство, во Њујорк во 2019 година додека чекаше судење по федерални обвиненија за трговија со жени, вклучително и малолетничка проституција.
