Палестинскиот претседател Абас ја прими турската делегација во Рамала

КУДС (АА) ‒ Палестинскиот претседател Махмуд Абас во Рамала ги прими портпаролот на турскиот претседател, Ибрахим Калин и заменик-министерот за надворешни работи, Седат Онал, според дипломатски извори, јавува Агенција Анадолија (АА).

Изворите наведоа дека на средбата се разговарало за односите меѓу Турција и Палестина. Турската делегација ја изрази континуираната поддршка на палестинскиот народ во рамките на дводржавното решение.

Турската делегација се сретна и со палестинскиот министер за надворешни работи, Ријад ал Малики, со кого разговараше за билатералните односи.

На средбата присуствуваше и турскиот генерален конзул во Кудс (Ерусалим), Ахмет Риза Демирер.

Калин и Онал денеска треба да се сретнат со претставници на израелското Министерство за надворешни работи и Претседателството.

Двајцата високи турски претставници вчера ја започнаа дводневната посета на Палестина и Израел.

Посетата се случува пред очекуваната посета на Турција на израелскиот претседател Исак Херцог во март, како што неодамна најави турскиот претседател Реџеп Таип Ердоган.