Палестински претставник: „Земјата оди на избори, за прв пат во нашата историја одлуката е во наши раце“

РАМАЛА (АА) - Џибрил ер-Руџуб, генералниот секретар на Централниот комитет на движењето Фaтах, изјави дека Палестина оди на општи избори и дека одлуката е во рацете на Палестинците, без влијание на регионалните страни, пренесува Агенција Анадолија (АА).

Во изјавата дадена за официјалниот палестински телевизиски канал, Руџуб рече дека се движат кон воспоставување внатрешно партнерство за одржување избори со пропорционална застапеност.

Руџуб изјави дека Палестинците одлучиле да воспостават партнерство во кое рамнотежата на внатрешните и националните сили ќе се рефлектира преку гласачките кутии.

Тој, исто така, рече дека се надева дека по изборите сите Палестинци ќе бидат во политичкиот систем со можност за формирање влада на национална коалиција.

Во врска со редоследот на изборите, Руџуб истакна дека во согласност со постигнатиот договор, ќе се формираат законодавниот дом, Претседателството и потоа Палестинскиот национален совет.

„Ние направивме компромис и никој не може да нè спречи да одржиме избори на кои ќе учествуваат сите групи и каде што ќе се обнови политичкиот систем. За прв пат во нашата историја, одлуката е во наши раце, надвор од надзор, туторство и влијание на регионалните страни“, додаде Руџуб.

Тој не даде информации за датумот на изборите, само истакна дека за неколку недели ќе се создадат условите.

Руџуб, исто така, додаде дека состанокот на лидерите на палестинските групи одржан на 3 септември е пресврт за иднината на палестинскиот народ.