ЛИСЕ (АА)
- Селман АКСУНГЕР
„Кукенхоф“, една од најголемите цветни градини во светот, која се наоѓа во Лисе, Холандија, по затворањето поради мерките воведени против ширењето на коронавирусот, повторно е отворена за посетители, јавува Агенција Анадолија (АА).
Цветната градина „Кукенхоф“ е втора по големина во светот. Позната е и како градина на Европа. Работи 73 години и има значајно место во туризмот на земјата.
Овогодишната тема ќе го нагласи фактот дека цветот со векови бил важен елемент во уметноста, архитектурата и дизајнот.
Претставничката од официјалната служба на „Кукенхоф“, Брит Варкевисер, за АА изјави дека во градините се засадени околу седум милиони луковици од лалиња од околу 1.600 вида.
Таа истакна дека подготовките за градината, каде што се изложени многу видови лалиња, траеле со месеци.
Градината „Кукенхоф“ е отворена само осум недели поради краткото траење на лалињата.
Во „Кукенхоф“, кој ја носи титулата најголема градина со лалиња во светот, се одржуваат и различни изложби во согласност со темите.
Благодарение на „Кукенхоф“, Холандија се здоби со репутација на земја со лалиња. Оваа градина расте и продава цвеќиња, а за посетители е отворена само во текот на април и мај.
Според официјалните податоци, овој „рај на земјата“ најмногу го посетуваат странски туристи, пред сѐ Германци, Американци, Французи, Британци и Кинези.
Еден милион луѓе се очекува да го посетат „Кукенхоф“ оваа година.
„Кукенхоф“, кој е основан во 1949 година со идеја да се одржи заедничка изложба на 10 одгледувачи на лалиња, во првата година го посетиле 236.000 луѓе.
„Кукенхоф“ придава големо значење на културата, така што лалињата одгледувани во оваа градина се именувани по уметници како Винсент ван Гог, Рембрант и Андре Кујперс. Бах, Бетовен, Ајнштајн, Кант, Маркс и Гете имаат свои катчиња во градината. Таа важи и за место каде што се направени најмногу фотографии.
Повеќе од четири милијарди лалиња се садат годишно во Холандија, а речиси половина од нив се извезуваат.
Од нив 25 отсто се извезуваат во САД, а 60 отсто во европските земји.
