ИСТАНБУЛ (АА) - Кениската Национална комисија за човекови права (KNCHR) денес јави за осуммина загинати од повреди од огнено оружје во шест окрузи за време на националните протести по повод годишнината од смртоносните протести против оданочувањето кои се одржаа минатата година, јавува Анадолу.

Претходно, локалните медиуми јавија дека бројот на жртви е четири, меѓу кои две деца.

Повредени се над 400 лица - демонстранти, полицајци и новинари - а најмалку 61 се приведени, според соопштението на Националната комисија за човекови права.

Оттаму се наведува и користење прекумерна сила, „гумени куршуми, боева муниција и водни топови“, што предизвика голем број повредени.

Комисијата соопшти дека добила веродостојни извештаи за „платени насилници“, кои се инфилтрирале во протестите во неколку градови, „вклучени во насилства, грабежи и уништување на имот“.

Исто така, „остро“ ја осуди наредбата на Управата за комуникации (CA), наложувајќи им на сите телевизиски и радио станици да го прекинат преносот во живо од протестите.

Високиот суд на Кенија издаде наредба со која се суспендира директивата на Управата. Судот наложи сите сигнали на емитување исклучени според оспорената директива да бидат „веднаш“ вратени, во исчекување на дополнителни наредби од судот.

Глобалната NetBlocks соопшти дека податоците во живо покажуваат дека се воведени ограничувања на Телеграм во Кенија, поради зголемената загриженост за пошироко исклучување на интернетот.

Кенискиот претседател Вилијам Руто ја повика нацијата да протестира „мирно без да запаѓање во хаос и уништување имот“, пренесе веб-страницата за вести „Kenyans“.

Илјадници луѓе денес излегоа на улиците низ целата земја за да ја одбележат првата годишнина од демонстрациите против Законот за финансии одржани на 25 јуни 2024 година, што доведоа до упад во Парламентот, полициска интервенција со огнено оружје и над 60 загинати.

Администрацијата на Руто се соочи со интензивен надзор за тоа како се справи со протестите, што предизвика и голема материјална штета.

Владата подоцна ги призна жртвите и исчезнувањата поврзани со немирите. Руто го распушти речиси целиот свој Кабинет во јули, задржувајќи го само премиер-секретарот на Кабинетот, Мусалија Мудавади.

Предизвикани од јавниот гнев поради зголемените трошоци за живот и даночните политики на Руто, демонстрациите во Најроби, Кисуму и Момбаса беа меѓу најинтензивните.

Првично фокусирани на економски барања, протестите ескалираа во барања за оставка на Руто.