Gülşen Topçu
02 Јуни 2020•Ажурирај: 03 Јуни 2020
ТРИПОЛИ (АА) - Мисијата на Обединетите нации за поддршка во Либија (UNSMIL) соопшти дека либиската Влада и водачот на нелегитимните сили на истокот на земјата, Калифа Хафтар, се согласиле да ги продолжат преговорите за прекин на огнот, пренесува Агенција Анадолија (AA).
Во соопштението на Мисијата на ОН се наведува дека преговорите за прекин на огнот и поврзаните безбедносни договори ќе бидат изградени врз темелите на договорот, претставен од Мисијата на ОН на 23 февруари, во преговорите на заедничкиот воен одбор во форматот 5 + 5.
Истакнато е дека ОН се задоволни затоа што „страните се согласија да седнат на маса и да продолжат со дијалогот на покана на Либијците, кои сакаат да имаат достоинствен и безбеден живот што е можно поскоро“.
Исто така беше наведено дека ОН се надеваат дека сите национални и меѓународни страни вклучени во либиското прашање ќе одговорат на повиците на либискиот народ да се прекине војната и дека преговорите 5 + 5 ќе создадат основа за конечен прекин на огнот.
Од Мисијата за поддршка на Обединетите нации во Либија (UNSMIL) нагласија дека „прекинот на судирите е важен, со цел либиските власти со сите свои средства да можат да се фокусираат на борбата против новиот вид коронавирус (Ковид-19) и да ги задоволат хуманитарните потреби на Либијците“.
Либија е средиште на длабока политичка и безбедносна криза уште од 2011 година, кога беше убиен Муамер Гадафи. Водачот на сепаратистичките сили од источна Либија, Калифа Хафтар, во април минатата година започна напад за заземање на главниот град Триполи, кој беше спречен од силите на Владата на национално единство на Либија.
