ЕРУСАЛИМ/ИСТАНБУЛ (АА) — Израелските авиони денес извршија воздушни напади врз неколку локации во Јужен и Источен Либан, што претставува најново прекршување на минатогодишниот договор за прекин на огнот, објавија либанските државни медиуми, пренесува Анадолу.

Државната новинска агенција на Либан (NNA) објави дека воздушните напади го погодиле коритото на реката во близина на јужниот град Завтар во округот Набатија и областа помеѓу Деир Сирјан и Ал-Кусаир во Марџајун.

Други напади беа пријавени во Источен Либан, особено во областа Зегрине на висорамнините Хермел и предградијата на Будаи, западно од Баалбек.

Сè уште нема информации за евентуални жртви.

Израелската армија тврди дека нападите биле насочени кон воени објекти на Хезболах и платформи за лансирање.

Ниту Хезболах ниту либанската Влада засега не ги коментираа нападите.

Минатата година беше постигнат прекин на огнот меѓу Тел Авив и Бејрут по повеќе од една година напади во контекст на војната во Појасот Газа. Повеќе од 4.000 луѓе беа убиени, а 17.000 беа повредени.

Израелската армија требаше да се повлече од Јужен Либан овој јануари според прекинот на огнот, но наместо тоа се повлече само делумно и продолжува да одржува воено присуство на пет гранични пункта.