Нов Зеланд најави хуманитарна помош од 2,4 милиони долари за Туркије и Сирија

АНКАРА (АА) - Нов Зеланд денес најави дополнителна хуманитарна помош од 4 милиони новозеландски долари (околу 2,4 милиони долари) за луѓето погодени од минатомесечните смртоносни земјотреси во Туркије и Сирија, јавува Анадолу.

Министерката за надворешни работи Нанаја Махута ја објави најновата помош, велејќи дека тоа е трета транша од хуманитарното финансирање за поддршка на оние што имаат итна потреба.

„Тажни сме што ги гледаме нашите пријатели и партнери во Туркије – земја со која имаме долготрајни и значајни односи – погодени во таков обем“, рече таа во изјавата.

„И оние што беа погодени од земјотресите во Сирија веќе беа исклучително ранлива заедница по 12-годишниот конфликт“, додаде Махута.

Со новата помош, вкупното хуманитарно финансирање на Нов Зеланд за луѓето погодени од земјотресите на 6 февруари во двете земји сега изнесува 8,5 милиони новозеландски долари (околу 5,2 милиона долари).

„Финансирањето беше ветено на Меѓународната донаторска конференција за поддршка на народот во Туркије и Сирија на 20 март во Брисел, организирана од Европската комисија, Владата на Шведска и турските власти“, се вели во соопштението.

Земјотреси со јачина од 7,7 и 7,6 степени по Рихтер на 6 февруари погодија 11 турски области – Адана, Адијаман, Дијарбакир, Елазиг, Хатај, Газиантеп, Кахраманмараш, Килис, Малатја, Османије и Шанлиурфа – и однесоа животи на повеќе од 50.000 луѓе.

Повеќе од 13,5 милиони луѓе во Туркије се погодени од земјотресите, како и многу други во Северна Сирија.