Elena Teslova
19 Мај 2023•Ажурирај: 21 Мај 2023
МОСКВА (АА) - Рускиот министер за надворешни работи, Сергеј Лавров, денеска изјави дека се состанал со ерменскиот и азербејџанскиот колега во Москва, за да дискутираат за Мапата на патот за нормализирање на односите меѓу Баку и Ереван, јавува Анадолу.
Лавров, кој ја отвори средбата, рече дека очекува неговите соговорници да го информираат за чекорите што Русија треба да ги преземе за да придонесе за спроведување на трилатералните договори, со кои заврши Втората војна во Карабах.
Односите меѓу двете поранешни советски републики се тензични од 1991 година, кога ерменската војска го окупираше Нагорно Карабах, територија меѓународно признаена како дел од Азербејџан, и седум соседни региони.
Во есента 2020 година, во 44-дневните судири, Азербејџан ослободи неколку градови, села и населби од ерменската окупација. Мировниот договор постигнат со посредство на Русија се слави како триумф во Азербејџан.
„Се сретнавме многу одамна и имаме многу нови теми. Се надевам дека денешната средба ќе се одвива во конструктивна атмосфера и дека вашиот директен дијалог ќе помогне да се постигнат дополнителни резултати“, рече тој.
Лавров предложи фокусирање во трилатералниот формат на можностите што ги има Русија, а кои може да се искористат за дефинирање на чекорите за нормализација меѓу Ерменија и Азербејџан.
„Целосно сме заинтересирани да имаме стабилност и мир во овој регион (Јужен Кавказ), каде што се директно вклучени интересите на Русија, ќе продолжиме да ги имплементираме решенијата што ќе доведат до стабилизација“, рече тој.
Лавров повика да се решат хуманитарните прашања, деблокирање на транспортните и економските врски и усогласување на текстот на идниот мировен договор.
Пред состанокот министерот оствари и одделни билатерални средби со ерменски и азербејџански врвни дипломати.
Со азербејџанскиот министер за надворешни работи Џејхун Бајрамов, Лавров предложи да се разговара за прашања поврзани со организирање на претседателска средба.
Од своја страна, Бајрамов ѝ се заблагодари на Русија за зачувувањето на споменот на азербејџанскиот лидер Хејдар Алиев и организирањето настани за одбележување на 100-годишнината од неговото раѓање.
Тој, исто така, го покани Лавров да разговара за билатералната агенда, која е „секогаш многу интензивна“ поради блиската соработка меѓу Азербејџан и Русија.
На разговорите со ерменскиот министер за надворешни работи Арарат Мирзојан, Лавров повика да се најдат решенија за три „клучни“ прашања - мировен договор, деблокирање на комуникациите и разграничување на границите.
Мирзојан рече дека Ереван е посветен на трилатералните договори на водачите на Ерменија, Азербејџан и Русија.
Сепак, тој го обвини Баку за прекршување на договорот, давајќи го за пример воспоставувањето граничен пункт на патот Лачин.
