Mahmut Geldi
01 Септември 2020•Ажурирај: 02 Септември 2020
БЕЈРУТ (АА) - МАХМУТ ГЕЛДИ -
Либанските експерти за политички науки истакнаа дека амбасадорот на Либан во Берлин, Мустафа Едиб, е назначен да ја формира Владата како резултат на договорот помеѓу Франција и Иран.
Либанскиот претседател Мишел Авн, вчера амбасадорот Едиб го назначи за мандатар на новата влада, откако Владата на премиерот Хасан Дијаб даде оставка на 10 август, по протестите како реакција на големата експлозија во пристаништето во Бејрут.
Во Либан, каде што процесот на формирање влада вообичаено трае подолго време поради разните конфликти меѓу политичките групи, се коментира дека притисоците на францускиот претседател Емануел Макрон довеле процесот за избор на новата Влада да биде забрзан.
Говорејќи за Агенција Анадолија, либанските експерти оценија дека во овој процес големо вјилание има договорот меѓу Франција и Иран.
- „Франција не прави ништо друго за Либан, освен што ветува“ -
Политичкиот аналитичар Тони Ебу Неџм рече дека Мустафа Едиб е назначен да ја формира Владата како резултат на договорот постигнат меѓу двете земји.
Потсетувајќи дека американскиот амбасадор во Бејрут дал изјава дека предлозите на Франција за воспоставување на Владата во Либан нив не ги засегаат, Ебу Неџм нагласи: „Според информациите што ги добив, арапските земји не гледаат позитивно на ова име. Франција за нејзините интереси во Либан отвори врата со Иран.“
Ебу Неџм рече дека Франција се обидува да ја зајакне својата улога во Либан за да може да трага по нафта и гас во Средоземното Море.
„Франција, исто така, се обидува да ги утеши Техеран и Хезболах со ветувања дека француските компании ќе склучат зделки со Иран доколку американскиот претседател Доналд Трамп загуби на изборите, и земјата се врати на нуклеарниот договор со Иран.“
Истакнувајќи дека Франција нема моќ да игра фундаментална улога во Либан, Ебу Неџм рече: „Франција не дава ништо друго освен ветувања за Либан. Франција нема финансиска моќ да го спаси Либан од економски колапс или да го реконструира.“
- „Франција се обидува да ја спречи улогата на Турција“ -
Либанскиот политички аналитичар Мунир ер-Раби, исто така, нагласи дека Едиб бил назначен да формира Влада како резултат на договор меѓу Франција и Иран.
Истакнувајќи дека има различно мислење меѓу Франција и Соединетите Американски Држави (САД) во врска со Либан, Раби рече: „Французите тврдат дека е неопходна соработката со Хезболах, кого го сметаат за главен партнер. Французите, исто така, сакаат да го продолжат своето влијание врз Либан, со политиката на шиитите, исто како што го правеа во изминатите 100 години со политиката на Маронитите христијани. Французите не ги расипуваат своите односи со сунитите.“
Раби потенцира дека Франција со овие чекори сака да ја спречи улогата на Турција во регионот: „Франција од една страна одржува цврсти односи со Иран и Хезболах, а од друга страна за својот став против Турција се обидува да добие поддршка од Арапите.“
Наведувајќи дека овој чекор што го презедоа Французите не е одобрен од САД, Раби рече дека Вашингтон го дефинира Хезболах како терористичка организација и ги продолжува своите санкции против организацијата, и затоа не е можно САД да бидат вклучени во овој договор.
Тој изјави дека ако Хезболах направи отстапки во согласност со условите на САД, договорот направен од Франција може да биде одобрен и од Вашингтон.
- „Договор постигнат врз остатоците на Либанците“ -
Либанскиот политички аналитичар Тони Булос го дефинира назначувањето на Мустафа Едиб као мандатар како француско-ирански договор што произлегол од разговорите меѓу Макрон и неговиот ирански колега Хасан Рохани во врска со Либан.
Булос развојот на настаните за формирање на новата влада ги опиша како „меѓународен договор постигнат врз остатоците на Либанците“, по големата експлозија во пристаништето во Бејрут.
„Ова не е ништо друго освен лепенка за политичката состојба во Либан. Не може да биде трајно решение за очекувањата на луѓето. Сегашните политички групи тоа не можат да го исполнат“, заклучи Тони Булос.
