Кремљ потврди дека средбата Русија - САД за Украина ќе се одржи утре во Ријад

МОСКВА (АА) - Портпаролот на Кремљ, Дмитриј Песков, денес потврди дека средбата Русија - Соединетите Американски Држави (САД) за Украина ќе се одржи утре (вторник) во главниот град на Саудиска Арабија, Ријад, јавува Анадолу.

Говорејќи на брифингот со новинарите во Москва, Песков изјави дека руската делегација ќе ја предводат министерот за надворешни работи Сергеј Лавров и помошникот на претседателот за надворешни работи Јуриј Ушаков.

„Денеска, во име на претседателот (Владимир) Путин, министерот за надворешни работи Лавров и помошникот на претседателот Ушаков летаат за Ријад. Тие се очекува да се состанат со нивните американски колеги утре, при што разговорите ќе бидат првенствено фокусирани на обновувањето на целиот спектар на руско-американски односи“, рече Песков.

„На средбата ќе се разговара за билатералните односи меѓу Русија и САД, подготовките за преговори за решение за Украина и потенцијалната средба меѓу лидерите на двете земји Путин и Доналд Трамп“, рече тој.

„Саудиска Арабија беше избрана за место затоа што е прифатливо за двете страни“, истакна Песков, додавајќи дека разговорите за европско учество во преговорите за решение за Украина сѐ уште се прерани.