Конгресменката Тлаиб ги обвини САД дека се „соучесници во геноцидот во Палестина“

АНКАРА (АА) – Рашида Тлаиб, демократска конгресменка во САД, во врска со планот на Израел за проширување на нападите врз Газа, ги обвини САД дека се соучесници во „овој геноцид“, известува Анадолу.

Тлаиб во објавата на социјалната мрежа X остро ги критикуваше плановите за проширување на израелските напади врз Газа.

Нагласувајќи дека Израел веќе 64 дена ја блокира хуманитарната помош за Газа, Тлаиб истакна:

„Воениот злосторник (израелскиот премиер Бенјамин) Нетанјаху го објави својот план за присилно протерување на целото палестинско население, спроведување етничко чистење, целосно уништување на Газа и негова анексија.“

Посочувајќи дека тоа отсекогаш било план на Израел, Тлаиб наведе: „САД се соучесници во овој геноцид.“

- План за проширување на окупацијата на Газа

Израелскиот безбедносен кабинет вчера го одобри планот за проширување на нападите врз Газа.

Во овој план се предвидува поголема окупација на териториите во Појасот Газа и проширување на „тампон-зоните“.

Планот вклучува израелската армија да не се повлече од окупираните подрачја и присилно принудување на Палестинците да мигрираат кон југот на Појасот Газа.

По усвојувањето на планот, израелскиот екстремно десничарски министер за финансии, Безалел Смотрич, за локалните медиуми изјави дека трајно ќе ја окупираат Газа.

Израелските медиуми објавија дека Израел планира да започне масовни напади врз Појасот Газа доколку не се постигне договор за размена на заробеници до завршувањето на посетата на американскиот претседател Доналд Трамп на Блискиот Исток овој месец.