Islam Uddin
05 Март 2026•Ажурирај: 06 Март 2026
ИСТАНБУЛ (AA) - Иранскиот министер за надворешни работи Сејед Абас Арагчи денес изјави дека на иранскиот воен брод што ден претходно беше нападнат од САД во близина на брегот на Шри Ланка се наоѓале 130 морнари, јавува Анадолу.
„САД извршија злосторство на море, на 2.000 милји од бреговите на Иран. Фрегатата Дена, гостин на индиската морнарица, со речиси 130 морнари на бродот, беше погодена во меѓународни води без предупредување“, напиша Арагчи на американската компанија за социјални медиуми X.
„Запомнете ги моите зборови: САД горко ќе зажалат за преседанот што го поставија“, предупреди тој.
Досега е потврдено дека најмалку 87 морнари се загинати откако бродот „ИРИС Дена“ бил погоден од американско торпедо вчера во близина на јужноазиската островска држава Шри Ланка.
Властите во Шри Ланка соопштија дека 32 морнари од бродот „ИРИС Дена“ се повредени и се лекуваат во наставната болница Карапитија во градот Гале.
Во водите крај јужниот град Гале во тек е операција за пребарување и спасување на исчезнатите морнари.
Американскиот секретар за одбрана Пит Хегсет потврди дека американските сили го нападнале иранскиот воен брод, кој минатиот месец учествувал на поморска вежба крај брегот на Индија.
„ИРИС Дена“ е фрегата од класата „Муџ“, која служи во Јужната флота на иранската морнарица.
Пред инцидентот, иранскиот воен брод неодамна учествуваше во мултинационалните поморски вежби „Милано 2026“ и преглед на флотата што се одржаа во Висакапатнам, Индија.
Нападот се случи во моментот кога САД и Израел продолжуваат со воздушните напади врз Иран што започнаа минатата сабота и во кои се убиени врховниот лидер на Иран, Али Хаменеи, и уште 926 други лица, вклучувајќи и голем број ученички.
Техеран возврати со напади со ракети и беспилотни летала врз Израел, како и врз земји од Заливот во кои се наоѓаат американски воени бази.
Министерот на Шри Ланка денес изјави дека друг ирански брод моментално се наоѓа во рамките на ексклузивната економска зона (ЕЕЗ) на Шри Ланка, според „Дејли мирор“.
„Владата е запознаена со случајот. Ги преземаме неопходните чекори за решавање на прашањето, ограничување на каква било закана по човечките животи и обезбедување регионална безбедност“, изјави министерот за здравство Налинда Џајатиса пред Парламентот, одговарајќи на прашање од опозицискиот лидер за присуството на уште еден ирански брод.
Тој додаде дека бродот не се наоѓа во територијалните води на Шри Ланка, туку „во ексклузивната економска зона“, и дека Владата презема максимални мерки за да ја осигури безбедноста на луѓето.
