Иранската државна телевизија објави снимки на кои тврди дека е прикажан соборен израелски дрон

АНКАРА / ИСТАНБУЛ (АА) – Иранската државна телевизија денес објави снимки за кои тврди дека се од израелски дрон од типот „Хермес 900“ соборен во покраината Исфахан, јавува Анадолу.

Според извештаите, единиците за воздушна одбрана на Иран го пресретнале и собориле дронот во источниот дел на Исфахан, при што се наведува дека бил опремен со осум напредни ракети.

Од своја страна, израелската Армија потврди дека еден нивни дрон бил соборен над територијата на Иран.

Во соопштението се наведува дека дронот бил погоден од иранска ракета земја-воздух за време на ноќна операција и дека потоа се урнал во Иран. Израелската страна додаде дека нема опасност од протекување на информации од дронот.

Од почетокот на нападите на Израел врз Иран на 13 јуни, иранските власти соопштија дека се соборени четири израелски борбени авиони и повеќе беспилотни летала (дронови и наоружани дронови – UCAV), но досега не беше прикажан ниту еден визуелен доказ.

Ова е првпат иранската страна да објави снимки како потврда.

- Ескалација на конфликтот меѓу Иран и Израел -

На 13 јуни, Израел изврши големи напади насочени кон нуклеарните постројки на Иран во неколку градови, како и кон високи воени командни центри.

Иранските медиуми денес објавија дека бројот на жртви од израелските воздушни напади низ Техеран и други населени области се искачи на 585, а најмалку 1.326 лица се повредени од почетокот на нападите минатата недела.

Како одмазда, иранската војска лансираше балистички ракети кон Израел, при што загинаа 24 лица, а над 500 се ранети, според извештаите.

Голем број земји, вклучително и Турција, ги осудија постапките на Израел.