АНКАРА (АА) - Иран откри резерви на природен гас од 283,2 милијарди кубни метри во јужниот регион на земјата, изјави денес министерот за нафта, Мохсен Пакнеџад, пренесува Анадолу.

Како што јави државната телевизија, иранскиот министер Пакнеџад соопштил дека новоидентификуваните резерви се пронајдени на гасното поле Пазен, кое се наоѓа во јужната покраина Фарс.

Пакнеџад истакна дека откритието е дел од тековните активности за истражување на нафта и гас во областа што се протега од полето Пазен во јужен Фарс до северните делови на покраината Бушер.

„Полето содржи 10 билиони кубни метри гас, со стапка на обновување од 70 %“, рече тој.

Министерот додаде дека новите резерви би можеле да играат значајна улога во справувањето со енергетските предизвици на Иран во наредните години.

Според американската Администрација за енергетски информации (EIA), Русија ги поседува најголемите докажани резерви на природен гас во светот со 47 милијарди кубни метри, додека Иран е на второ место со 34 билиони кубни метри.

И покрај тоа што поседува околу 17 % од докажаните светски резерви на гас, Иран бара значителни инвестиции за да ги развие своите главни гасни полиња.

Сепак, американските санкции продолжуваат да ги спречуваат западните компании да склучуваат договори поврзани со енергетиката со Техеран. Во 2018 година, по повторното воведување на американските санкции насочени кон нафтената индустрија и извозот на Иран, францускиот енергетски гигант „Тотал“ се повлече од своите проекти во земјата.

Во последните месеци, Иран, еден од водечките светски сопственици на нафтени и гасни ресурси, доживува периодични недостатоци на енергија поради комбинираните ефекти од економските санкции, недоволните инвестиции во инфраструктурата и зголемената домашна побарувачка.