свет

Индија: Воен хеликоптер ги спаси жителите од зграда пред уривање во поплавите во Пенџаб

Армијата истакна дека зградата веќе била на работ на уривање, додавајќи дека спасувањето било навремена интервенција

Elena Trenchevska Chekovic  | 28.08.2025 - Обновена : 28.08.2025
Индија: Воен хеликоптер ги спаси жителите од зграда пред уривање во поплавите во Пенџаб

СКОПЈЕ (АА) - Жители на Пенџаб, Индија, беа спасени во последен момент од зграда која беше пред уривање поради поплавите во близина на браната на централата Мадхопур, јавува Анадолу.

Хеликоптер на индиската армија во последен миг ги спаси и ги префрли жителите на безбедно место.

Армијата истакна дека зградата веќе била на работ на уривање, додавајќи дека спасувањето било навремена интервенција.

Индија и Пакистан се зафатени од големи монсунски дождови и поплави во последните недели, во коишто речиси 500 лица загинаа во Пакистан од 14 август, од кои над 400 во северозападната покраина Хајбер Пахтунхва, додека повеќе од 800 луѓе ги загубија животите низ целиот Пакистан од 26 јуни.

Според официјални претставници, илјадници жители останаа блокирани и во последните неколку дена во регионот Гилгит-Балтистан во Пакистан откако поројните дождови и поплавите уништија неколку патишта во округот Гизер.

Пакистан ја распореди армијата во североисточната покраина Пенџаб за да помогне во операциите за спасување и помош, бидејќи покраината се соочува со вонредна состојба од поплави предизвикани од обилните дождови и испуштањето вода од страна на Индија од браните.

Надојдените води однесоа најмалку седум лица во градот Самбриал во североисточниот округ Сиалкот, каде што обилните дождови го соборија рекордот во последните 49 години, изјави портпаролот на покраинската служба за спасување.

Њу Делхи го предупреди Исламабад за очекуваните високи приливи на реките Сутлеџ, Рави и Ченаб.

Армијата беше распоредена на барање на владата на Пенџаб за да ѝ помогне на цивилната администрација во евакуацијата на жителите од областите што се соочуваат со сериозни поплави.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.