Израелските сили убија четворица Палестинци на окупираниот Западен Брег

РАМАЛА (АА)

Најмалку четворица Палестинци загинаа во воздушен напад и рациите на израелските војници врз градот Џенин на окупираниот Западен Брег, јавува Анадолу.

Според вестите на државната палестинска новинска агенција ВАФА, во нападот што израелската војска го извршила со беспилотни летала врз бегалскиот камп Џенин на северниот дел на Западниот Брег, убиени се двајца Палестинци, а неколкумина се повредени.

Израелските сили ги спречија возилата на брза помош да дојдат до повредените.

Од палестинското Министерство за здравство е наведено дека уште двајца Палестинци, Мухаед Ситити (31) и Џихад Ибрахим Нанаије (26), се убиени во рацијата што ја извршиле израелските војници во градот Џенин.

Наведено е дека бројот на Палестинци убиени во нападите на израелските сили и еврејските доселеници на окупираниот Западен Брег од 7 октомври се зголемил на 138.

Израелската војска ги прошири воздушните и копнените напади врз Појасот Газа, кој е под немилосрдни воздушни напади откако палестинската група Хамас започна ненадејна офанзива против Израел на 7 октомври.

Во израелските напади врз Појасот Газа загинаа 9.061 Палестинец.